رباعيات صلاح جاهين

هاحاول اكتب كل اللى عندى
واللى عنده حاجة جديدة مش عندى يقولها

مع ان كل الخلق من أصل طين
وكلهم بينزلوا مغمضين
بعد الدقايق والشهور والسنين
تلاقى ناس أشرار وناس طيبين
عجبى !!!!!

عجبى عليك يا زمن يا أبو البدع
يا مبكى عينى دماً
ازاى اختار لروحى طريق؟
وأنا اللى داخل فى الحياة مرغماً
عجبى !!!!!

مرغم عليك يا صبح مغصوب يا ليل
لا دخلتها برجليا ولا كان لى ميل
شايلنى شيل دخلت أنا فى الحياة
وبكرة هاخرج منها شايلنى شيل
عجبى !!!!!

سنوات وفايته عليا فوج بعد فوج
واحدة خدتنى ابن والتانية زوج
والتالتة أب خدتنى والرابعة إيه
إيه يعمل اللى بيحدفه موج لموج؟
عجبى !!!!!

أنا شاب لكن عمرى ولا ألف عام
وحيد ولكن بين ضلوعى زحام
خايف ولكن خوفى منى أنا
أخرس ولكن قلبى مليان كلام
عجبى !!!!!

حبيت لكن حب من غير حنان
وصاحبت،لكن صحبة ملهاش أمان
رحت لحكيم وأكتر لقيت بلوتى
إن اللى جوة القلب موش ع اللسان
عجبى !!!!!

ياما صادفت أصحاب وماصحبتهمش
وكاسات خمور وشراب ومشربتهمش
أندم ع الفرص اللى أنا سبتهم
والا ع الفرص اللى مسبتهمش
عجبى !!!!!

غدر الزمان يا قلبى مالوش أمان
وهايجى يوم تحتاج لحبة إيمان
ارتجف وسألنى أأمن بإيه؟؟
أأمن بإيه محتار بقالى زمان
عجبى !!!!!

يا باب أيا مقفول .. امتى الدخول؟
صبرت ياما واللى يصبر ينول
دقيت سنين والرد يرجعلى : مين؟؟
لو كنت عارف مين ... أنا كنت أقول
عجبى !!!!!

سهير ليالى وياما لفيت وطفت
فى ليلة راجع فى الظلام قمت شفت
الخوف كأنه كلب سد الطريق
وكنت عاوز أقتله بس خفت
عجبى !!!!!

أنا قلبى كان شخشيخة أصبح جرس
جلجلت بيه صحيوا الخدم والحرس
أنا المهرج قمتوا ليه؟؟ خفتوا ليه؟؟
لا فى إيدى سيف ولا تحت منى فرس
عجبى !!!!!

دخل الربيع يضحك لقانى حزين
نده الربيع على اسمى لما قلت مين؟
حط الربيع أزهاره جنبى وراح
وإيش تعمل الأزهار للميتين؟
عجبى !!!!!

مهبوش بخربوش الألم والضياع
قلبى ومنزوع من الضلوع انتزاع
يا مرايتى ياللى بترسمى ضحكتى
يا هل ترى ده وش ولا قناع؟؟
عجبى !!!!!

ليه يا حبيبتى ما بينا دايماً سفر؟
ده البعد ذنب كبير لا يغتفر
ليه يا حبيبتى ما بينا دايماً بحور؟
أعدى بحر ألاقى غيره اتحفر
عجبى !!!!!

ورا كل شباك الف عين مفتوحين
وأنا وأنتى ماشيين يا غرامى الحزين
لو التصقنا نموت بضربة حجر
ولو افترقنا نموت متحسرين
عجبى !!!!!

نوح راح لحاله والطوفان استمر
مركبنا تايهة لسه موش لاقية بر
آه من الطوفان وآهين يا بر الأمان
إزاى تبان والدنيا غرقانة شر
عجبى !!!!!

على رجلى دم ، نظرت له ما احتملت
على ايدى دم ، سألت: ليه؟ لما وصلت
على كتفى دم وحتى على راسى دم
أنا كلى دم أقتلت؟؟ ولا اتقتلت؟؟
عجبى !!!!!

أنا كل يوم أسمع فلان عذبوه
أسرح فى بغداد والجزاير وأتوه
ما اعجبش من اللى يطيق بجسمه العذاب
واعجب من اللى يطيق يعذب أخوه
عجبى !!!!!

ينبوع وفى الحواديت أنا سمعت عنه
سمعت إنه عجيب وف وسط لهاليب لكنه
شقيت كما الفرسان طرقى لقيت
حتى الخنازير والكلاب شربوا منه
عجبى !!!!!

يا قرص شمس مالهوش قبة سما
يا ورد من غير أرض شب ونما
يا أى معنى جميل سمعنا عليه
الخلق ليه عايشين حياة مؤلمة
عجبى !!!!!

شاف الطبيب جرحى وصف له الأمل
وعطانى منه مقام يا دوب ما اندمل
مجروح جديد يا طبيب وجرحى لهيب
ودواك فرغ منى وإيه العمل؟؟
عجبى !!!!!

أعرف عيون هيا الجمال والحسن
وأعرف عيون تاخد القلوب بالحضن
وعيون مخيفة وقاسيةوعيون كتير
و باحس فيهم كلهم بالحزن
عجبى !!!!!

إيش تطلبى يا نفس فوق كل ده؟
حظك بيضحك وأنتى متنكده
ردت قالت لى النفس: قول للبشر
ما يبصوليش بعيون حزينة كده
عجبى !!!!!

إقلع غُماك يا تور وارفض تلف
إكسر تروس الساقية وأشتم وتف
قال: بس خطوة كمان وخطوة كمان
يا أوصل نهاية السكة ، يا البير يجف
عجبى !!!!!

يا حزين يا قمقم تحت بحر الضياع
حزين أنا زيك وإيه مستطاع؟
الحزن مابقالهوش جلال يا جدع
الحزن زى البرد زى الصداع
عجبى !!!!!

فى يوم صحيت شاعر براحة وصفا
الهم زال والحزن راح واختفى
خدنى العجب وسألت روحى سؤال
أنا مت؟؟ ولا وصلت للفلسفة؟؟
عجبى !!!!!

الفيلسوف قاعد يفكر سيبوه
لا تعملوه سلطان ولا تصلبوه
ما تعرفوش أن الفلاسفة يا هوه
اللى يقولوه بيرجعوا يكدبوه؟
عجبى !!!!!

على بعد مليون ميل من أرضنا
من الفراغ الكونى بصيت أنا
لا شفت فرق ما بين جبال أو بحر
ولا شفت فرق بين عذاب أو هنا
عجبى !!!!!

إنسان إيا إنسان ما أجهلك
ما أتفهك فى الكون وما أضألك
شمس وقمر وسدوم وملايين نجوم
وفاكرها يا موهوم مخلوقه لك؟؟
عجبى !!!!!

نظرت فوقى للنجوم وأنا ساير
رجليا عترت فى الحفر والحجاير
بقيت أقول أنا والتراب : يا سلام
مش بس عبرة أخدت لكن عباير
عجبى !!!!!

يا نجم نورك ليه كده بيرتجف؟
هو أنت قندل زيت؟ أو تختلف؟
أنا نجم عالى بس عالى قوى
وكل ما أنظر تحت أخاف انحدف
عجبى !!!!!

!